काठमाडौँ । पुर्वान्चलमा तय गरिएको सातौं राष्ट्रिय खेलकुद प्रतियोगिता मंसिरको दोस्रो साता हुने भएको छ । राष्ट्रिय खेलकुद परिषद् (राखेप) को आइतबार बसेको १ सय ६ औ बोर्ड बैठकले यसअघि विभिन्न कारणले स्थगित हुदै आएको सातौं राष्ट्रिय खेलकुद प्रतियोगिताको मिति तय गरेको हो ।
बोर्ड बैठकले प्रतियोगिता मंसिर ८ देखि १५ सम्म सञ्चालन गर्ने निर्णय गरेको छ । यसअघि सातौ राष्ट्रिय खेलकुद प्रतियोगिता दुई पटक सरिसकेको छ । सातौ राष्ट्रिय खेलकुद पहिलोपटक गत बर्षको मंसिर ११ बाट १८ मा गर्ने भनिएपनि समयमै बजेट निकासा नहुदा स्थगित हुदै आएको थियो । त्यसपछि फागुन १८ देखि २३ गते हुने तय गरिए पनि सातौ राष्ट्रिय खेलकुद हुन् सकेको थिएन ।
त्यस्तै बोर्ड बैठकले नेपालमा हुने १३ औ दक्षिण एसियाली खेलकुद सागको तयारीका लागि सदस्य सचिवको संयोजकत्वमा कमिटि बनाउने निर्णय पनि गरेको छ । सागको तयारी र पूर्वाधार निमार्णको तयारी थाल्न सदस्य सचिवको संयोजकत्वमा डेस्क बनाउने निर्णय भएको छ ।
सातौ राष्ट्रिय खेलकुदमा ३५ वटा खेललाई समावेश गर्ने यसअघि नै निर्णय भैसकेको छ । त्यस्तै सातौ खेलकुदका लागि लोगो र मस्कट यसअघि नै सार्वजनिक भैसकेको छ ्र छैटौं राष्ट्रिय खेलकुद प्रतियोगितामा समाविष्ट भएका खेल बाहेक खोखो, ट्रायथलन, सेपाकताक्रो र फेन्सिङ्ग खेललाइ सातौंमा समावेश गरेकोछ। थप गरिएका चार खेल मध्ये ट्रायथलन, सेपाकताक्रो र फेन्सिङ्ग पहिलो पटक राष्ट्रिय खेलकुदमा समेटिएको छ ।
सातौ राष्ट्रिय प्रतियोगिताको अधिकांश खेल सुनसरीमा र मोरङ्गमा हुने छ । सुनसरीमा १५, मोरङ्गमा १३, झपामा ५, सिराहामा १, सप्तरीमा १ र ईलाममा १ खेल आयोजना हुने राखेपले जनाएको छ ।
